ഇന്നു ഞാനറിഞ്ഞു ’നീയെന്നെ സ്നേഹിച്ചിരുന്നെന്ന്’.

 നീ എന്നോടു പറഞ്ഞു “നമ്മെ സ്നേഹിക്കുന്നവരെ തിരിച്ചു സ്നേഹിക്കാന്‍ കഴിയാത്തത് ഒരു ശാപമാണല്ലെ?” ഇന്നാദ്യമായി ഞാന്‍ നിന്റെ സ്നേഹം തിരിച്ചറിയുകയായിരുന്നു. ഇന്നു നിന്റെ കണ്ണുകളില്‍ കണ്ട വിഷാദം…അതിനു ഞാനെന്തര്‍ത്ഥമാണ് നല്‍കേണ്ടത്?

മതവും പണവും കൊടികുത്തി വാഴുന്ന ഈ ലോകത്തു സ്നേഹത്തിനു വിലയില്ല എന്നു നീ വിശ്വസിച്ചു. “നന്മയുടെ ലോകം  ഇന്നതെവിടെ?”  നീ ചോദിച്ചു..ചൂണ്ടിക്കാണിക്കാന്‍ എനിക്കെന്റെ ഹൃദയമെ ഉണ്ടായിരുന്നുള്ളു.  അന്നു നീ എന്റെ സ്നേഹത്തെ അവഗണിച്ചു, വളരെ ക്രൂരമായി അവഗണിച്ചു.  പക്ഷെ ഇന്നു ഞാനറിയുന്നു ആ അവഗണന നിന്റെ സ്നേഹക്കൂടുതല്‍ ആയിരുന്നെന്ന്.

നീ എന്നെ അറിഞ്ഞിരുന്നു എന്നെനിക്കറിയാം. പക്ഷെ… ഞാന്‍ നിന്നെ അറിഞ്ഞിരുന്നുവോ? ഒരിക്കലെങ്കിലും?? അറിയാന്‍ ശ്രമിച്ചപ്പോഴെല്ലാം നീ ഉള്‍വലിഞ്ഞു, നിന്റെ ആ ലോകത്തേക്കു. പകയും വിദ്വേഷവും മാത്രമുള്ള ആ ലോകം. ആ ലോകം നിനക്കെന്തിനാണു… ആ കെട്ടുപാടുകളെ പൊട്ടിച്ചെറിയാന്‍ മാത്രം നിനക്ക് ശക്തിയില്ലാതെ പോയതെന്തെ?.

ഈ നിമിഷം നീ എന്റെ അരികിലില്ല. എന്നന്നേക്കുമായി നീ എന്നെ വിട്ടു പിരിഞ്ഞു, ഞാനതറിയുന്നു എങ്കിലും എന്റെ ഹൃദയം ഇപ്പൊഴും സ്പന്ദിക്കുകയാണ് നിനക്കു വേണ്ടി. ഒരു പക്ഷെ നിനക്കായി മാത്രം…